التونسي المتطرف

فدينا من السياسة .من الصباح لليل .هاو صار هاو جرى هاو قال هاو رد عليه .هاو طلع تجمعي هاو طلع بوليس سياسي .اديني ما ثماش حاجة اخرى نحكو عليها في البلاد ..منجمو ا نحكو في شيىء بعيد ع السياسة .قبل 2011 وقبل الي صار في البلاد وقتلي هرب بن علي كان الحديث في كل مكان كان على الكورة هاو ربح هاو خسر هاو ماتش هنا هاو ماطش غادي .ما كنتش نتبع بصراحة .كنت مهتم بالشان العام اكثر وواجعني قلبي على البلاد وقتها كانت كلمة صباح الخير في الشارع تتحسب عليك باش تقولها لمعارض او انك ادور وجهك باش ما تقلوش صباح الخير على خاطر ثمة شكون في الشارع ممكن يقود عليك ويغضب عليك الحاكم .هاكا علاش كانوا المعارضين قلة قليلة في كل بلاد في تونس اليوم الشعب كامل تسيب واصبح يفهم في السياسة .اديني التونسي ما يعرفش يوزع اهتماماتو .ما فيها باس كان تكون حياتو الواحد موزعة على عدة اهتمامات هكة ينجم ياثث بيها نشاطو ويجددو .وينجم يبدع في كل المجالات ام باش يبدى عندنا الملاين من السياسيين والمحللين فالامور تخرج من نطاق المعقول لتصل الى حالة المرض .هذا بالضبط تقريبا اش صار للتوانسة بعد 2011 واسالو مشافي الامراض العقلية والنفسية في البلاد واسالوا اطباء العيادات النفسية عن تزايد اعداد معيديهم .